View source for فاطمہ بنت عبداللہ

<center>
== فاطمہ بنت عبداللہ ==

=== عرب لڑکی جو طرابلس کی جنگ میں غازیوں کو پانی پلاتی ہوئی شہید ہوئی 1912ء ===
فاطمہ! تو آبروئے امت مرحوم ہے <br>
ذرہ ذرہ تیری مشت خاک کا معصوم ہے<br>

یہ سعادت، حور صحرائی! تری قسمت میں تھی<br> 
غازیان دیں کی سقائی تری قسمت میں تھی<br>

یہ جہاد اللہ کے رستے میں بے تیغ و سپر<br>
ہے جسارت آفریں شوق شہادت کس قدر<br>

یہ کلی بھی اس گلستان خزاں منظر میں تھی<br> 
ایسی چنگاری بھی یارب، اپنی خاکستر میں تھی!<br>

اپنے صحرا میں بہت آہو ابھی پوشیدہ ہیں<br>
بجلیاں برسے ہوئے بادل میں بھی خوابیدہ ہیں!<br>

فاطمہ! گو شبنم افشاں آنکھ تیرے غم میں ہے<br> 
نغمہ عشرت بھی اپنے نالہ ماتم میں ہے<br>

رقص تیری خاک کا کتنا نشاط انگیز ہے<br> 
ذرہ ذرہ زندگی کے سوز سے لبریز ہے<br>

ہے کوئی ہنگامہ تیری تربت خاموش میں<br> 
پل رہی ہے ایک قوم تازہ اس آغوش میں<br>

بے خبر ہوں گرچہ ان کی وسعت مقصد سے میں<br> 
آفرینش دیکھتا ہوں ان کی اس مرقد سے میں<br>

تازہ انجم کا فضائے آسماں میں ہے ظہور<br> 
دیدئہ انساں سے نامحرم ہے جن کی موج نور<br>

جو ابھی ابھرے ہیں ظلمت خانہء ایام سے<br> 
جن کی ضو ناآشنا ہے قید صبح و شام سے<br>

جن کی تابانی میں انداز کہن بھی، نو بھی ہے<br> 
اور تیرے کوکب تقدیر کا پرتو بھی ہے<br>
</center>