Actions

Kamal-E-Josh-E-Janoon Mein Raha Mai Garm-E-Tawaf

From IQBAL

کمال جوش جنوں میں رہا میں گرم طواف


کمال جوش جنوں میں رہا میں گرم طواف 

خدا کا شکر، سلامت رہا حرم کا غلاف

یہ اتفاق مبارک ہو مومنوں کے لیے 

کہ یک زباں ہیں فقیہان شہر میرے خلاف

تڑپ رہا ہے فلاطوں میان غیب و حضور 

ازل سے اہل خرد کا مقام ہے اعراف

ترے ضمیر پہ جب تک نہ ہو نزول کتاب 

گرہ کشا ہے نہ رازی نہ صاحب کشاف

سرور و سوز میں ناپائدار ہے، ورنہ 

م ے فرنگ کا تہ جرعہ بھی نہیں ناصاف