View source for Insan aur bazm e qudrat

<center>
==انسان اور بزم قدرت==

صبح خورشید درخشاں کو جو دیکھا میں نے<br>
بزم معمورہ ہستی سے یہ پوچھا میں نے<br>

پر تو مہر کے دم سے ہے اجالا تیرا<br>
سیم سیال ہے پانی ترے دریائوں کا<br>

مہر نے نور کا زیور تجھے پہنایا ہے<br>
تیری محفل کو اسی شمع نے چمکایا ہے<br>

گل و گلزار ترے خلد کی تصویریں ہیں<br>
یہ سبھی سورہء 'والشمس' کی تفسیریں ہیں<br>

سرخ پوشاک ہے پھولوں کی، درختوں کی ہری<br>
تیری محفل میں کوئی سبز، کوئی لال پری<br>

ہے ترے خیمہء گردوں کی طلائی جھالر<br>
بدلیاں لال سی آتی ہیں افق پر جو نظر<br>

کیا بھلی لگتی ہے آنکھوں کو شفق کی لالی<br>
مے گلرنگ خم شام میں تو نے ڈالی<br>

رتبہ تیرا ہے بڑا، شان بڑی ہے تیری<br>
پردہ نور میں مستور ہے ہر شے تیری<br>

صبح اک گیت سراپا ہے تری سطوت کا<br>
زیر خورشید نشاں تک بھی نہیں ظلمت کا<br>

میں بھی آباد ہوں اس نور کی بستی میں مگر<br>
جل گیا پھر مری تقدیر کا اختر کیونکر؟<br>

نور سے دور ہوں ظلمت میں گرفتار ہوں میں<br>
کیوں سیہ روز، سیہ بخت، سیہ کار ہوں میں؟<br>

میں یہ کہتا تھا کہ آواز کہیں سے آئی<br>
بام گردوں سے وہ یا صحن زمیں سے آئی<br>

ہے ترے نور سے وابستہ مری بود و نبود<br>
باغباں ہے تری ہستی پے گلزار وجود<br>

انجمن حسن کی ہے تو، تری تصویر ہوں میں<br>
عشق کا تو ہے صحیفہ، تری تفسیر ہوں میں<br>

میرے بگڑے ہوئے کاموں کو بنایا تو نے<br>
بار جو مجھ سے نہ اٹھا وہ اٹھایا تو نے<br>

نور خورشید کی محتاج ہے ہستی میری<br>
اور بے منت خورشید چمک ہے تری<br>

ہو نہ خورشید تو ویراں ہو گلستاں میرا<br>
منزل عیش کی جا نام ہو زنداں میرا<br>

آہ! اے راز عیاں کے نہ سمجھے والے<br>
حلقہ، دام تمنا میں الجھنے والے<br>

ہائے غفلت کہ تری آنکھ ہے پابند مجاز<br>
ناز زیبا تھا تجھے، تو ہے مگر گرم نیاز<br>

تو اگر اپنی حقیقت سے خبردار رہے<br>
نہ سیہ روز رہے پھر نہ سیہ کار رہے<br>
</center>