View source for Aik pahar aur gulehri

<center>
==ایک پہاڑ اور گلہری==

کوئی پہاڑ یہ کہتا تھا اک گلہری سے<br>
تجھے ہو شرم تو پانی میں جا کے ڈوب مرے<br>

ذرا سی چیز ہے، اس پر غرور، کیا کہنا<br>
یہ عقل اور یہ سمجھ، یہ شعور، کیا کہنا!<br>

خدا کی شان ہے ناچیز چیز بن بیٹھیں<br>
جو بے شعور ہوں یوں باتمیز بن بیٹھیں<br>

تری بساط ہے کیا میری شان کے آگے<br>
زمیں ہے پست مری آن بان کے آگے<br>

جو بات مجھ میں ہے، تجھ کو وہ ہے نصیب کہاں<br>
بھلا پہاڑ کہاں جانور غریب کہاں<br>

کہا یہ سن کے گلہری نے، منہ سنبھال ذرا<br>
یہ کچی باتیں ہیں دل سے انھیں نکال ذرا<br>

جو میں بڑی نہیں تیری طرح تو کیا پروا<br>
نہیں ہے تو بھی تو آخر مری طرح چھوٹا<br>

ہر ایک چیز سے پیدا خدا کی قدرت ہے<br>
کوئی بڑا، کوئی چھوٹا، یہ اس کی حکمت ہے<br>

بڑا جہان میں تجھ کو بنا دیا اس نے<br>
مجھے درخت پہ چڑھنا سکھا دیا اس نے<br>

قدم اٹھانے کی طاقت نہیں ذرا تجھ میں<br>
نری بڑائی ہے، خوبی ہے اور کیا تجھ میں<br>

جو تو بڑا ہے تو مجھ سا ہنر دکھا مجھ کو<br>
یہ چھالیا ہی ذرا توڑ کر دکھا مجھ کو<br>

نہیں ہے چیز نکمی کوئی زمانے میں<br>
کوئی برا نہیں قدرت کے کارخانے میں<br>
</center>