View source for غلام قادر رہیلہ

<center>
== غلام قادر رہیلہ ==

رہیلہ کس قدر ظالم، جفا جو، کینہ پرور تھا<br>
نکالیں شاہ تیموری کی آنکھیں نوک خنجر سے<br>

دیا اہل حرم کو رقص کا فرماں ستم گر نے<br>
یہ انداز ستم کچھ کم نہ تھا آثار محشر سے<br>

بھلا تعمیل اس فرمان غیرت کش کی ممکن تھی! <br>
شہنشاہی حرم کی نازنینان سمن بر سے<br>

بنایا آہ! سامان طرب بیدرد نے ان کو<br> 
نہاں تھا حسن جن کا چشم مہر و ماہ و اختر سے<br>

لرزتے تھے دل نازک، قدم مجبور جنبش تھے<br> 
رواں دریائے خوں، شہزادیوں کے دیدئہ تر سے<br>

یونہی کچھ دیر تک محو نظر آنکھیں رہیں اس کی<br> 
کیا گھبرا کے پھر آزاد سر کو بار مغفر سے<br>

کمر سے، اٹھ کے تیغ جاں ستاں، آتش فشاں کھولی<br> 
سبق آموز تابانی ہوں انجم جس کے جوہر سے<br>

رکھا خنجر کو آگے اور پھر کچھ سوچ کر لیٹا<br> 
تقاضا کر رہی تھی نیند گویا چشم احمر سے<br>

بجھائے خواب کے پانی نے اخگر اس کی آنکھوں کے<br> 
نظر شرما گئی ظالم کی درد انگیز منظر سے<br>

پھر اٹھا اور تیموری حرم سے یوں لگا کہنے<br> 
شکایت چاہیے تم کو نہ کچھ اپنے مقدر سے<br>

مرا مسند پہ سو جانا بناوٹ تھی، تکلف تھا<br> 
کہ غفلت دور سے شان صف آرایان لشکر سے<br>

یہ مقصد تھا مرا اس سے، کوئی تیمور کی بیٹی<br> 
مجھے غافل سمجھ کر مار ڈالے میرے خنجر سے<br>

مگر یہ راز آخر کھل گیا سارے زمانے پر<br> 
حمیت نام ہے جس کا، گئی تیمور کے گھر سے<br>
</center>