View source for بلاد اسلامیہ

<center>
== بلاد اسلامیہ ==

سرزمیں دلی کی مسجود دل غم دیدہ ہے <br>
ذرے ذرے میں لہو اسلاف کا خوابیدہ ہے<br>

پاک اس اجڑے گلستاں کی نہ ہو کیونکر زمیں <br>
خانقاہ عظمت اسلام ہے یہ سرزمیں <br>

سوتے ہیں اس خاک میں خیر الامم کے تاجدار <br>
نظم عالم کا رہا جن کی حکومت پر مدار<br>

دل کو تڑپاتی ہے اب تک گرمی محفل کی یاد <br>
جل چکا حاصل مگر محفوظ ہے حاصل کی یاد<br>

ہے زیارت گاہ مسلم گو جہان آباد بھی <br>
اس کرامت کا مگر حق دار ہے بغداد بھی<br>

یہ چمن وہ ہے کہ تھا جس کے لیے سامان ناز<br> 
لالہ صحرا جسے کہتے ہیں تہذیب حجاز<br>

خاک اس بستی کی ہو کیونکر نہ ہمدوش ارم <br>
جس نے دیکھے جانشینان پیمبر کے قدم<br>

جس کے غنچے تھے چمن ساماں، وہ گلشن ہے یہی <br>
کاپنتا تھا جن سے روما، ان کا مدفن ہے یہی<br>

ہے زمین قرطبہ بھی دیدہء مسلم کا نور <br>
ظلمت مغرب میں جو روشن تھی مثل شمع طور<br>

بجھ کے بزم ملت بیضا پریشاں کر گئی <br>
اور دیا تہذیب حاضر کا فروزاں کر گئی<br>

قبر اس تہذیب کی یہ سر زمین پاک ہے<br> 
جس سے تاک گلشن یورپ کی رگ نم ناک ہے<br>

خطہ قسطنطنیہ یعنی قیصر کا دیار<br> 
مہدی امت کی سطوت کا نشان پائدار<br>

صورت خاک حرم یہ سر زمیں بھی پاک ہے <br>
آستان مسند آرائے شہ لولاک ہے<br>

نکہت گل کی طرح پاکیزہ ہے اس کی ہوا <br>
تربت ایوب انصاری سے آتی ہے صدا<br>

اے مسلماں! ملت اسلام کا دل ہے یہ شہر <br>
سینکڑوں صدیوں کی کشت و خوں کا حاصل ہے یہ شہر<br>

وہ زمیں ہے تو مگر اے خواب گاہ مصطفی<br>
دید ہے کعبے کو تیری حج اکبر سے سوا<br>

خاتم ہستی میں تو تاباں ہے مانند نگیں <br>
اپنی عظمت کی ولادت گاہ تھی تیری زمیں<br>

تجھ میں راحت اس شہنشاہ معظم کو ملی <br>
جس کے دامن میں اماں اقوام عالم کو ملی<br>

نام لیوا جس کے شاہنشاہ عالم کے ہوئے<br>
جانشیں قیصر کے، وارث مسند جم کے ہوئے<br>

ہے اگر قومیت اسلام پابند مقام <br>
ہند ہی بنیاد ہے اس کی، نہ فارس ہے، نہ شام<br>

آہ یثرب! دیس ہے مسلم کا تو، ماوا ہے تو<br>
نقطہ جاذب تاثر کی شعاعوں کا ہے تو<br>

جب تلک باقی ہے تو دنیا میں، باقی ہم بھی ہیں <br>
صبح ہے تو اس چمن میں گوہر شبنم بھی ہیں<br>
</center>