View source for ابلیس کی مجلسِ شُوریٰ

<center>
=== اِبلیس ===
یہ عناصِر کا پُرانا کھیل، یہ دُنیائے دُوں</br>
ساکنانِ عرشِ اعظم کی تمنّاؤں کا خوں!</br>
اس کی بربادی پہ آج آمادہ ہے وہ کارساز</br>
جس نے اس کا نام رکھّا تھا جہانِ کاف و نوں</br>
میں نے دِکھلایا فرنگی کو مُلوکیّت کا خواب</br>
مَیں نے توڑا مسجد و دَیر و کلیِسا کا فسوں</br>
مَیں نے ناداروں کو سِکھلایا سبق تقدیر کا</br>
مَیں نے مُنعِم کو دیا سرمایہ داری کا جُنوں</br>
کون کر سکتا ہے اس کی آتشِ سوزاں کو سرد</br>
جس کے ہنگاموں میں ہو اِبلیس کا سوزِ دروں</br>
جس کی شاخیں ہوں ہماری آبیاری سے بلند</br>
کون کر سکتا ہے اُس نخلِ کُہن کو سرنِگُوں!</br>
=== پہلامُشیر ===
اس میں کیا شک ہے کہ محکم ہے یہ اِبلیسی نظام</br>
پُختہ تر اس سے ہوئے خُوئے غلامی میں عوام</br>
ہے اَزل سے ان غریبوں کے مقدّر میں سجود</br>
ان کی فطرت کا تقاضا ہے نمازِ بے قیام</br>
آرزو اوّل تو پیدا ہو نہیں سکتی کہیں</br>
ہو کہیں پیدا تو مر جاتی ہے یا رہتی ہے خام</br>
یہ ہماری سعیِ پیہم کی کرامت ہے کہ آج</br>
صوفی و مُلّا مُلوکیّت کے بندے ہیں تمام</br>
طبعِ مشرق کے لیے موزُوں یہی افیون تھی</br>
ورنہ ’قوّالی‘ سے کچھ کم تر نہیں ’علمِ کلام‘!</br>
ہے طواف و حج کا ہنگامہ اگر باقی تو کیا</br>
کُند ہو کر رہ گئی مومن کی تیغِ بے نیام</br>
کس کی نومیدی پہ حجت ہے یہ فرمانِ جدید؟</br>
’ہے جہاد اس دَور میں مردِ مسلماںپر حرام!</br>
=== دُوسرا مُشیر===
خیر ہے سُلطانیِ جمہور کا غوغا کہ شر</br>
تُو جہاں کے تازہ فِتنوں سے نہیں ہے با خبر!</br>
=== پہلا مُشیر===
ہُوں، مگر میری جہاں بینی بتاتی ہے مجھے</br>
جو ملوکیّت کا اک پردہ ہو، کیا اُس سے خطر!</br>
ہم نے خود شاہی کو پہنایا ہے جمہُوری لباس</br>
جب ذرا آدم ہُوا ہے خود شناس و خود نگر</br>
کاروبارِ شہریاری کی حقیقت اور ہے</br>
یہ وجودِ مِیر و سُلطاں پر نہیں ہے منحصَر</br>
مجلسِ ملّت ہو یا پرویز کا دربار ہو</br>
ہے وہ سُلطاں، غیر کی کھیتی پہ ہو جس کی نظر</br>
تُو نے کیا دیکھا نہیں مغرب کا جمہُوری نظام</br>
چہرہ روشن، اندرُوں چنگیز سے تاریک تر!</br>
=== تیسرا مُشیر ===
روحِ سُلطانی رہے باقی تو پھر کیا اضطراب</br>
ہے مگر کیا اُس یہُودی کی شرارت کا جواب؟</br>
وہ کلیمِ بے تجلّی، وہ مسیحِ بے صلیب</br>
نیست پیغمبر و لیکن در بغل دارد کتاب</br>
کیا بتاؤں کیا ہے کافر کی نگاہِ پردہ سوز</br>
مشرق و مغرب کی قوموں کے لیے روزِ حساب!</br>
اس سے بڑھ کر اور کیا ہوگا طبیعت کا فساد</br>
توڑ دی بندوں نے آقاؤں کے خیموں کی طناب!</br>
=== چوتھا مُشیر ===
توڑ اس کا رومۃُالکُبریٰ کے ایوانوں میں دیکھ</br>
آلِ سیزر کو دِکھایا ہم نے پھر سیزر کا خواب</br>
کون بحرِ روم کی موجوں سے ہے لِپٹا ہُوا</br>
’گاہ بالد چوں صنوبر، گاہ نالد چوں رباب‘</br>
=== تیسرا مُشیر===
مَیں تو اُس کی عاقبت بینی کا کچھ قائل نہیں</br>
جس نے افرنگی سیاست کو کِیا یوں بے حجاب</br>
=== پانچواں مُشیر===
( اِبلیس کو مخاطَب کرکے)</br>
اے ترے سوزِ نفس سے کارِ عالم اُستوار!</br>
تُو نے جب چاہا، کِیا ہر پردگی کو آشکار</br>
آبِ و گِل تیری حرارت سے جہانِ سوز و ساز</br>
ابلہِ جنّت تری تعلیم سے دانائے کار</br>
تجھ سے بڑھ کر فطرتِ آدم کا وہ محرم نہیں</br>
سادہ دل بندوں میں جو مشہور ہے پروردگار</br>
کام تھا جن کا فقط تقدیس و تسبیح و طواف</br>
تیری غیرت سے ابَد تک سرنِگون و شرمسار</br>
گرچہ ہیں تیرے مرید افرنگ کے ساحِر تمام</br>
اب مجھے ان کی فراست پر نہیں ہے اعتبار</br>
وہ یہودی فِتنہ گر، وہ روحِ مزدک کا بُروز</br>
ہر قبا ہونے کو ہے اس کے جُنوں سے تار تار</br>
زاغِ دشتی ہو رہا ہے ہمسرِ شاہین و چرغ</br>
کتنی سُرعت سے بدلتا ہے مزاجِ روزگار</br>
چھا گئی آشُفتہ ہو کر وسعتِ افلاک پر</br>
جس کو نادانی سے ہم سمجھے تھے اک مُشتِ غبار</br>
فِتنۀ فردا کی ہیبت کا یہ عالم ہے کہ آج</br>
کانپتے ہیں کوہسار و مرغزار و جُوئبار</br>
میرے آقا! وہ جہاں زیر و زبر ہونے کو ہے</br>
جس جہاں کا ہے فقط تیری سیادت پر مدار</br>
=== اِبلیس ===
( اپنے مُشیروں سے)</br>
ہے مرے دستِ تصرّف میں جہانِ رنگ و بو</br>
کیا زمیں، کیا مہر و مہ، کیا آسمانِ تُو بتُو</br>
دیکھ لیں گے اپنی آنکھوں سے تماشا غرب و شرق</br>
مَیں نے جب گرما دیا اقوامِ یورپ کا لہُو</br>
کیا امامانِ سیاست، کیا کلیسا کے شیوخ</br>
سب کو دیوانہ بنا سکتی ہے میری ایک ہُو</br>
کارگاہِ شیشہ جو ناداں سمجھتا ہے اسے</br>
توڑ کر دیکھے تو اس تہذیب کے جام و سبو!</br>
دستِ فطرت نے کیا ہے جن گریبانوں کو چاک</br>
مزدکی منطق کی سوزن سے نہیں ہوتے رفو</br>
کب ڈرا سکتے ہیں مجھ کو اشتراکی کُوچہ گرد</br>
یہ پریشاں روزگار، آشفتہ مغز، آشُفتہ مُو</br>
ہے اگر مجھ کو خطر کوئی تو اُس اُمّت سے ہے</br>
جس کی خاکستر میں ہے اب تک شرارِ آرزو</br>
خال خال اس قوم میں اب تک نظر آتے ہیں وہ</br>
کرتے ہیں اشکِ سحر گاہی سے جو ظالم وضُو</br>
جانتا ہے، جس پہ روشن باطنِ ایّام ہے</br>
مزدکِیّت فتنہ فردا نہیں، اسلام ہے!</br>
(۲)</br>
جانتا ہُوں میں یہ اُمّت حاملِ قُرآں نہیں</br>
ہے وہی سرمایہ داری بندۀ مومن کا دِیں</br>
جانتا ہُوں میں کہ مشرق کی اندھیری رات میں</br>
بے یدِ بیضا ہے پیرانِ حرم کی آستیں</br>
عصرِ حاضر کے تقاضاؤں سے ہے لیکن یہ خوف</br>
ہو نہ جائے آشکارا شرعِ پیغمبر کہیں</br>
الحذَر! آئینِ پیغمبر سے سَو بار الحذَر</br>
حافظِ نامُوسِ زن، مرد آزما، مرد آفریں</br>
موت کا پیغام ہر نوعِ غلامی کے لیے</br>
نے کوئی فُغفور و خاقاں، نے فقیرِ رہ نشیں</br>
کرتا ہے دولت کو ہر آلودگی سے پاک صاف</br>
مُنعموں کو مال و دولت کا بناتا ہے امیں</br>
اس سے بڑھ کر اور کیا فکر و عمل کا انقلاب</br>
پادشاہوں کی نہیں، اﷲ کی ہے یہ زمیں!</br>
چشمِ عالم سے رہے پوشیدہ یہ آئِیں تو خوب</br>
یہ غنیمت ہے کہ خود مومن ہے محرومِ یقیں</br>
ہے یہی بہتر الٰہیات میں اُلجھا رہے</br>
یہ کتابُ اللہ کی تاویلات میں اُلجھا رہے</br>
(۳)</br>
توڑ ڈالیں جس کی تکبیریں طلسمِ شش جہات</br>
ہو نہ روشن اُس خدا اندیش کی تاریک رات</br>
ابن مریم مر گیا یا زندۀ جاوید ہے</br>
ہیں صفاتِ ذاتِ حق، حق سے جُدا یا عینِ ذات؟</br>
آنے والے سے مسیحِ ناصری مقصود ہے</br>
یا مجدّد، جس میں ہوں فرزندِ مریم کے صفات؟</br>
ہیں کلامُ اللہ کے الفاظ حادث یا قدیم</br>
اُمّتِ مرحوم کی ہے کس عقیدے میں نجات؟</br>
کیا مسلماں کے لیے کافی نہیں اس دَور میں</br>
یہ الٰہیات کے ترشے ہُوئے لات و منات؟</br>
تم اسے بیگانہ رکھّو عالمِ کردار سے</br>
تا بساطِ زندگی میں اس کے سب مُہرے ہوں مات</br>
خیر اسی میں ہے، قیامت تک رہے مومن غلام</br>
چھوڑ کر اَوروں کی خاطر یہ جہانِ بے ثبات</br>
ہے وہی شعر و تصوّف اس کے حق میں خوب تر</br>
جو چھُپا دے اس کی آنکھوں سے تماشائے حیات</br>
ہر نفَس ڈرتا ہُوں اس اُمّت کی بیداری سے مَیں</br>
ہے حقیقت جس کے دیں کی احتسابِ کائنات</br>
مست رکھّو ذکر و فکرِ صُبحگاہی میں اسے</br>
پختہ تر کر دو مزاجِ خانقاہی میں اسے</br>
</center>