View source for Abr-e-kohsar

<center>
==ابر کوہسار==

ہے بلندی سے فلک بوس نشیمن میرا<br>
ابر کہسار ہوں گل پاش ہے دامن میرا<br>

کبھی صحرا، کبھی گلزار ہے مسکن میرا<br>
شہر و ویرانہ مرا، بحر مرا، بن میرا<br>

کسی وادی میں جو منظور ہو سونا مجھ کو<br>
سبزہ کوہ ہے مخمل کا بچھونا مجھ کو<br>

مجھ کو قدرت نے سکھایا ہے درافشاں ہونا<br>
ناقہ شاہد رحمت کا حدی خواں ہونا<br>

غم زدائے دل افسردہ دہقاں ہونا<br>
رونق بزم جوانان گلستاں ہونا<br>

بن کے گیسو رخ ہستی پہ بکھر جاتا ہوں<br>
شانہ موجہ صرصر سے سنور جاتا ہوں<br>

دور سے دیدہ امید کو ترساتا ہوں<br>
کسی بستی سے جو خاموش گزر جاتا ہوں<br>

سیر کرتا ہوا جس دم لب جو آتا ہوں<br>
بالیاں نہر کو گرداب کی پہناتا ہوں<br>

سبزہ مزرع نوخیز کی امید ہوں میں<br>
زادہ بحر ہوں پروردہ خورشید ہوں میں<br>

چشمہ کوہ کو دی شورش قلزم میں نے<br>
اور پرندوں کو کیا محو ترنم میں نے<br>

سر پہ سبزے کے کھڑے ہو کے کہا قم میں نے<br>
غنچہ گل کو دیا ذوق تبسم میں نے<br>

فیض سے میرے نمونے ہیں شبستانوں کے<br>
جھونپڑے دامن کہسار میں دہقانوں کے<br>

</center>