View source for والدہ مرحومہ کی یاد میں

<center>
== والدہ مرحومہ کی یاد میں ==

ذرہ ذرہ دہر کا زندانی تقدیر ہے <br>
پردئہ مجبوری و بے چارگی تدبیر ہے<br>

آسماں مجبور ہے، شمس و قمر مجبور ہیں<br> 
انجم سیماب پا رفتار پر مجبور ہیں<br>

ہے شکت انجام غنچے کا سبو گلزار میں<br> 
سبزہ و گل بھی ہیں مجبور نمو گلزار میں<br>

نغمہ بلبل ہو یا آواز خاموش ضمیر<br> 
ہے اسی زنجیر عالم گیر میں ہر شے اسیر<br>

آنکھ پر ہوتا ہے جب یہ سر مجبوری عیاں<br> 
خشک ہو جاتا ہے دل میں اشک کا سیل رواں<br>

قلب انسانی میں رقص عیش و غم رہتا نہیں<br> 
نغمہ رہ جاتا ہے، لطف زیروبم رہتا نہیں<br>

علم و حکمت رہزن سامان اشک و آہ ہے<br> 
یعنی اک الماس کا ٹکڑا دل آگاہ ہے<br>

گرچہ میرے باغ میں شبنم کی شادابی نہیں<br> 
آنکھ میری مایہ دار اشک عنابی نہیں<br>

جانتا ہوں آہ، میں آلام انسانی کا راز<br> 
ہے نوائے شکوہ سے خالی مری فطرت کا ساز<br>

میرے لب پر قصہ نیرنگی دوراں نہیں<br> 
دل مرا حیراں نہیں، خنداں نہیں، گریاں نہیں<br>

پر تری تصویر قاصد گریہء پیہم کی ہے<br> 
آہ! یہ تردید میری حکمت محکم کی ہے<br>

گریہ سرشار سے بنیاد جاں پائندہ ہے<br> 
درد کے عرفاں سے عقل سنگدل شرمندہ ہے<br>

موج دود آہ سے آئینہ ہے روشن مرا<br> 
گنج آب آورد سے معمور ہے دامن مرا<br>

حیرتی ہوں میں تری تصویر کے اعجاز کا<br> 
رخ بدل ڈالا ہے جس نے وقت کی پرواز کا<br>

رفتہ و حاضر کو گویا پا بپا اس نے کیا<br> 
عہد طفلی سے مجھے پھر آشنا اس نے کیا<br>

جب ترے دامن میں پلتی تھی وہ جان ناتواں<br> 
بات سے اچھی طرح محرم نہ تھی جس کی زباں<br>

اور اب چرچے ہیں جس کی شوخی گفتار کے<br> 
بے بہا موتی ہیں جس کی چشم گوہربار کے<br>

علم کی سنجیدہ گفتاری، بڑھاپے کا شعور<br> 
دنیوی اعزاز کی شوکت، جوانی کا غرور<br>

زندگی کی اوج گاہوں سے اتر آتے ہیں ہم<br>
صحبت مادر میں طفل سادہ رہ جاتے ہیں ہم<br>

بے تکلف خندہ زن ہیں، فکر سے آزاد ہیں<br> 
پھر اسی کھوئے ہوئے فردوس میں آباد ہیں<br>

کس کو اب ہوگا وطن میں آہ! میرا انتظار<br> 
کون میرا خط نہ آنے سے رہے گا بے قرار<br>

خاک مرقد پر تری لے کر یہ فریاد آئوں گا<br> 
اب دعائے نیم شب میں کس کو یاد میں آئوں گا!<br>

تربیت سے تیری میں انجم کا ہم قسمت ہوا<br> 
گھر مرے اجداد کا سرمایہ عزت ہوا<br>

دفتر ہستی میں تھی زریں ورق تیری حیات<br> 
تھی سراپا دیں و دنیا کا سبق تیری حیات<br>

عمر بھر تیری محبت میری خدمت گر رہی<br>
میں تری خدمت کے قابل جب ہوا تو چل بسی<br>

وہ جواں، قامت میں ہے جو صورت سرو بلند<br> 
تیری خدمت سے ہوا جو مجھ سے بڑھ کر بہرہ مند<br>

کاروبار زندگانی میں وہ ہم پہلو مرا<br> 
وہ محبت میں تری تصویر، وہ بازو مرا<br>

تجھ کو مثل طفلک بے دست و پا روتا ہے وہ<br> 
صبر سے ناآشنا صبح و مسا روتا ہے وہ<br>

تخم جس کا تو ہماری کشت جاں میں بو گئی<br> 
شرکت غم سے وہ الفت اور محکم ہوگئی<br>

آہ! یہ دنیا، یہ ماتم خانہ برنا و پیر<br> 
آدمی ہے کس طلسم دوش و فردا میں اسیر!<br>

کتنی مشکل زندگی ہے، کس قدر آساں ہے موت<br> 
گلشن ہستی میں مانند نسیم ارزاں ہے موت<br>

زلزلے ہیں، بجلیاں ہیں، قحط ہیں، آلام ہیں<br>
کیسی کیسی دختران مادر ایام ہیں<br>!

کلبہ افلاس میں، دولت کے کاشانے میں موت<br> 
دشت و در میں، شہر میں، گلشن میں، ویرانے میں موت<br>

موت ہے ہنگامہ آرا قلزم خاموش میں<br> 
ڈوب جاتے ہیں سفینے موج کی آغوش میں<br>

نے مجال شکوہ ہے، نے طاقت گفتار ہے<br> 
زندگانی کیا ہے، اک طوق گلو افشار ہے!<br>

قافلے میں غیر فریاد درا کچھ بھی نہیں<br> 
اک متاع دیدئہ تر کے سوا کچھ بھی نہیں<br>

ختم ہو جائے گا لیکن امتحاں کا دور بھی<br> 
ہیں پس نہ پردئہ گردوں ابھی اور بھی<br>

سینہ چاک اس گلستاں میں لالہ و گل ہیں تو کیا<br> 
نالہ و فریاد پر مجبور بلبل ہیں تو کیا<br>

جھاڑیاں، جن کے قفس میں قید ہے آہ خزاں<br> 
سبز کر دے گی انھیں باد بہار جاوداں<br>

خفتہ خاک پے سپر میں ہے شرار اپنا تو کیا<br> 
عارضی محمل ہے یہ مشت غبار اپنا تو کیا<br>

زندگی کی آگ کا انجام خاکستر نہیں<br> 
ٹوٹنا جس کا مقدر ہو یہ وہ گوہر نہیں<br>

زندگی محبوب ایسی دیدئہ قدرت میں ہے<br>
ذوق حفظ زندگی ہر چیز کی فطرت میں ہے<br>

موت کے ہاتھوں سے مٹ سکتا اگر نقش حیات<br> 
عام یوں اس کو نہ کر دیتا نظام کائنات<br>

ہے اگر ارزاں تو یہ سمجھو اجل کچھ بھی نہیں<br> 
جس طرح سونے سے جینے میں خلل کچھ بھی نہیں<br>

آہ غافل! موت کا راز نہاں کچھ اور ہے<br> 
نقش کی ناپائداری سے عیاں کچھ اور ہے<br>

جنت نظارہ ہے نقش ہوا بالائے آب<br> 
موج مضطر توڑ کر تعمیر کرتی ہے حباب<br>

موج کے دامن میں پھر اس کو چھپا دیتی ہے یہ<br> 
کتنی بیدردی سے نقش اپنا مٹا دیتی ہے یہ<br>

پھر نہ کر سکتی حباب اپنا اگر پیدا ہوا<br> 
توڑنے میں اس کے یوں ہوتی نہ بے پروا ہوا<br>

اس روش کا کیا اثر ہے ہےئت تعمیر پر<br> 
یہ تو حجت ہے ہوا کی قوت تعمیر پر<br>

فطرت ہستی شہید آرزو رہتی نہ ہو<br> 
خوب تر پیکر کی اس کو جستجو رہتی نہ ہو<br>

آہ سیماب پریشاں، انجم گردوں فروز<br> 
شوخ یہ چنگاریاں، ممنون شب ہے جن کا سوز<br>

عقل جس سے سر بہ زانو ہے وہ مدت ان کی ہے<br> 
سرگزشت نوع انساں ایک ساعت ان کی ہے<br>

پھر یہ انساں، آں سوئے افلاک ہے جس کی نظر<br> 
قدسیوں سے بھی مقاصد میں ہے جو پاکیزہ تر<br>

جو مثال شمع روشن محفل قدرت میں ہے<br> 
آسماں اک نقطہ جس کی وسعت فطرت میں ہے<br>

جس کی نادانی صداقت کے لیے بیتاب ہے<br> 
جس کا ناخن ساز ہستی کے لیے مضراب ہے<br>

شعلہ یہ کمتر ہے گردوں کے شراروں سے بھی کیا<br> 
کم بہا ہے آفتاب اپنا ستاروں سے بھی کیا<br>

تخم گل کی آنکھ زیر خاک بھی بے خواب ہے<br> 
کس قدر نشوونما کے واسطے بے تاب ہے<br>

زندگی کا شعلہ اس دانے میں جو مستور ہے<br> 
خود نمائی، خودفزائی کے لیے مجبور ہے<br>

سردی مرقد سے بھی افسردہ ہو سکتا نہیں<br> 
خاک میں دب کر بھی اپنا سوز کھو سکتا نہیں<br>

پھول بن کر اپنی تربت سے نکل آتا ہے یہ<br>
موت سے گویا قبائے زندگی پاتا ہے یہ<br>

ہے لحد اس قوت آشفتہ کی شیرازہ بند<br> 
ڈالتی ہے گردن گردوں میں جو اپنی کمند<br>

موت، تجدید مذاق زندگی کا نام ہے<br> 
خواب کے پردے میں بیداری کا اک پیغام ہے<br>

خوگر پرواز کو پرواز میں ڈر کچھ نہیں<br> 
موت اس گلشن میں جز سنجیدن پر کچھ نہیں<br>

کہتے ہیں اہل جہاں درد اجل ہے لا دوا<br> 
زخم فرقت وقت کے مرہم سے پاتا ہے شفا<br>

دل مگر، غم مرنے والوں کا جہاں آباد ہے<br> 
حلقہ زنجیر صبح و شام سے آزاد ہے<br>

وقت کے افسوں سے تھمتا نالئہ ماتم نہیں<br> 
وقت زخم تیغ فرقت کا کوئی مرہم نہیں<br>
</center>