View source for مجنوں نے شہر چھوڑا تو صحرا بھی چھوڑ دے

<center>
==مجنوں نے شہر چھوڑا تو صحرا بھی چھوڑ دے==

مجنوں نے شہر چھوڑا تو صحرا بھی چھوڑ دے<br>
نظارے کی ہوس ہو تو لیلی بھی چھوڑ دے<br>

واعظ! کمال ترک سے ملتی ہے یاں مراد<br>
دنیا جو چھوڑ دی ہے تو عقبی بھی چھوڑ دے<br>

تقلید کی روش سے تو بہتر ہے خودکشی<br>
رستہ بھی ڈھونڈ، خضر کا سودا بھی چھوڑ دے<br>

مانند خامہ تیری زباں پر ہے حرف غیر<br>
بیگانہ شے پہ نازش بے جا بھی چھوڑ دے<br>

لطف کلام کیا جو نہ ہو دل میں درد عشق<br>
بسمل نہیں ہے تو تو تڑپنا بھی چھوڑ دے<br>

شبنم کی طرح پھولوں پہ رو، اور چمن سے چل<br>
اس باغ میں قیام کا سودا بھی چھوڑ دے<br>

ہے عاشقی میں رسم الگ سب سے بیٹھنا<br>
بت خانہ بھی، حرم بھی، کلیسا بھی چھوڑ دے<br>

سوداگری نہیں، یہ عبادت خدا کی ہے<br>
اے بے خبر! جزا کی تمنا بھی چھوڑ دے<br>

اچھا ہے دل کے ساتھ رہے پاسبان عقل<br>
لیکن کبھی کبھی اسے تنہا بھی چھوڑ دے<br>

جینا وہ کیا جو ہو نفس غیر پر مدار<br>
شہرت کی زندگی کا بھروسا بھی چھوڑ دے<br>

شوخی سی ہے سوال مکرر میں اے کلیم!<br>
شرط رضا یہ ہے کہ تقاضا بھی چھوڑ دے<br>

واعظ ثبوت لائے جو مے کے جواز میں<br>
اقبال کو یہ ضد ہے کہ پینا بھی چھوڑ دے<br>
</center>