View source for لکھا ہے ایک مغربی حق شناس نے

<center>
== بلال ==

لکھا ہے ایک مغربی حق شناس نے <br>
اہل قلم میں جس کا بہت احترام تھا<br>

جولاں گہ سکندر رومی تھا ایشیا<br> 
گردوں سے بھی بلند تر اس کا مقام تھا<br>

تاریخ کہہ رہی ہے کہ رومی کے سامنے<br> 
دعوی کیا جو پورس و دارا نے، خام تھا<br>

دنیا کے اس شہنشہ انجم سپاہ کو<br> 
حیرت سے دیکھتا فلک نیل فام تھا<br>

آج ایشیا میں اس کو کوئی جانتا نہیں<br> 
تاریخ دان بھی اسے پہچانتا نہیں<br>

لیکن بلال، وہ حبشی زادئہ حقیر<br> 
فطرت تھی جس کی نور نبوت سے مستنیر<br>

جس کا امیں ازل سے ہوا سینہء بلال<br> 
محکوم اس صدا کے ہیں شاہنشہ و فقیر<br>

ہوتا ہے جس سے اسود و احمر میں اختلاط<br> 
کرتی ہے جو غریب کو ہم پہلوئے امیر<br>

ہے تازہ آج تک وہ نوائے جگر گداز<br> 
صدیوں سے سن رہا ہے جسے گوش چرخ پیر<br>

اقبال! کس کے عشق کا یہ فیض عام ہے<br> 
رومی فنا ہوا، حبشی کو دوام ہے<br>
</center>